ABŞ-ın Azərbaycandakı səfirliyi İlqar Məmmədov və Tofiq Yaqublunun həbsindən narahatdır. Bu barədə ABŞ səfirliyinin mətbuat katibi Jonas Stewart AzadlıqRadiosunun son həbslərlə bağlı sualını şərh edərkən deyib: «Yanvarın 23-24-ü hadisələri və ondan sonra keçirilən etirazlarla bağlı biz Azərbaycan hökumətini müvafiq qanuni prosedurlara əməl etməyə və şəffaf, ədalətli məhkəmə prosesinin təmin olunmasına çağırırıq.Biz qanuni şikayətlərin həlli üçün Azərbaycan hökuməti ilə vətəndaşları mənalı dialoqa və hökuməti vətəndaşların sərbəst toplaşma və ifadə azadlığına hörmətlə yanaşmağa çağırırıq».
ATƏT-in Bakı ofisi də İlqar Məmmədovla Tofiq Yaqublunun həbsindən narahat olduğunu bildirib. AzadlıqRadiosunun sualına cavab olaraq ATƏT-in Bakı ofisindən belə deyiblər.
«ATƏT-in Bakı Ofisi yüksək səviyyəli siyasi fiqurların tutulması ilə bağlı narahatlığını bildirir. Biz ümid edirik ki, davam edən istintaq və qarşıdan gələn məhkəmə ədalətli və şəffaf şəkildə keçiriləcək və bu proseslər demokratik islahatlara mənfi təsir göstərməyəcək.
ATƏT-in Bakı Ofisi inanır ki, bu yaxınlarda İsmayıllıda baş vermiş iğtişaşlara cavabın ən effektiv yolu məhz dialoq və əsaslı islahatlardır».
Ofis ATƏT öhdəliklərinin yerinə yetirilməsində Azərbaycan hökuməti və vətəndaş cəmiyyətinə dəstəyini davam etdirməyə hazır olduğunu bildirir.
Fevralın 4-də REAL lideri İlqar Məmmədovla Müsavat başqanının müavini Tofiq Yaqublu haqqında 2 aylıq həbs-qətimkan tədbiri seçilib.
İsmayıllı hadisələrinə görə həbs edilən hər iki şəxs Cinayət Məcəlləsinin 233 (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) və 315.2-ci (hakimiyyət nümayəndəsinə qarşı müqavimət və ya zor tətbiq etmə) maddələri ilə təqsirləndirilirlər. Hər iki şəxs özlərini təqsirli saymır.
ABŞ-ın Azərbaycandakı səfirliyi İlqar Məmmədov və Tofiq Yaqublunun həbsindən narahatdır
